O Santiago Futsal prepárase para o encontro do venres en Zaragoza

O equipo do Santiago Futsal reincorporouse esta mañá aos adestramentos tras o descanso que o técnico Santi Valladares lles concedeu no día de Reis. O conxunto branco adestrou esta mañá e volverase exercitar esta tarde, e xa prepara o encontro deste venres, segundo da segunda volta, ante D Link Zaragoza en terras mañas ás 20.45 h.

Tras o primeiro encontro do ano o pasado domingo ante Magna Navarra, no que o equipo caeu por 1-3 nun partido que, se ben puido igualar nos últimos compases do encontro, supuxo a primeira derrota da segunda volta, agora o equipo enfróntase a un rival directo na loita por conseguir a permanencia. O D Link Zaragoza chega a este encontro tras caer na pista do Xaén Paraíso Interior por 3-2, derrota que lles fai asentarse na 12ª posición con 16 puntos, a tres do Santiago Futsal que é 10º.

O conxunto branco desprazarase mañá a Zaragoza, tras concluír o adestramento da mañá, e exercitarase en terras mañá o venres pola mañá, antes do encontro ás 20.45 h.