O Santiago Futsal non logra os primeiros puntos do ano nun partido insulso

Un instante do encontro

Conseguiu Magna Navarra a primeira vitoria no Multi usos Fontes do Sar tras doce partidos de Liga disputados nesta cancha fronte ao Santiago Futsal. O gol temperán de Javi Eseverri, anubraba o obxectivo dos composteláns de sumar os primeiros tres puntos do ano na casa, que malia lograr a igualada antes do descanso, viron como o partido se lles poñía costa arriba co 1-2 de Jesulito.

Aos dous minutos de comezar o partido, Javi Eseverri adiantaba os seus no marcador co primeiro tiro da escuadra visitante, e do partido, ao introducir un tiro raso na meta defendida por Iker.

Tras o gol visitante, e cun Santiago Futsal que non estaba cómodo en pista, tendo que empregarse en defensa para frear as acometidas pamplonicas, chegaron os tiros ao pau de Jesulito primeiro, e de Carlitos despois, nun tiro libre que pegaría na escuadra.

Pero no ecuador da primeira parte, o conxunto local empregaríase con maior acerto en ataque, e chegarían as ocasións máis claras para igualar o marcador. A triangulación de Diego Quintela, Galego e Santi, que non chega a rematar ao segundo pau, sería o primeiro arreón dos de Santiago que avisaban do perigo.

Sería Iván Rumbo o que roubarían o balón e abriría a Hugo para que este asistise a Pablo Tallón ao segundo pau para que o de Santiago fixese o 1-1 antes do descanso.

Ao comezo da segunda metade, Jesulito volvería adiantar aos seus nun disparo dende fóra da área apenas transcorridos 20 segundos dende o asubío inicial.

Co 1-2 no marcador, o conxunto visitante protagonizaría varias ocasións para aumentar a vantaxe, pero Iker empregaríase baixo paus salvando os tiros de Eseverri e Jesulito, que serían os homes con maior perigo dos de Navarra.

Cando o encontro se achegaba aos minutos finais, Hugo enfundouse a camiseta de porteiro xogador. Sería entón cando se vivirían os minutos de maior intensidade local, podendo conseguir o empate na ocasión de Diego Quintela sobre a liña de gol, ou o tiro de Lucas Bolo que salva o meta visitante.

Javi Eseverri faría o terceiro e definitivo para os seus a falta dun minuto e medio para a finalización do partido, esgotando as posibilidades locais de conseguir a igualadada.