O pleno da Laracha reuniuse na sesión ordinaria

O Pleno do Concello da Laracha reuniuse hoxe na sesión ordinaria correspondente ao mes de xaneiro, que estivo presidida polo tenente alcalde, José Ramón Martínez Barbeito, debido a que o alcalde, José Manuel López Varela, se atopa en Madrid para participar na presentación sobre A Laracha que mañá se realizará no salón da Feira Internacional de Turismo (Fitur). Polo mesmo motivo tamén escusou a súa ausencia Patricia Bello, concelleira delegada de Turismo, entre outras áreas.

A sesión celebrada hoxe, tal e como é habitual, principiou gardando un minuto de silencio en memoria e homenaxe ás mulleres falecidas vítimas da violencia de xénero, que en España son dúas no que levamos de ano 2015.

Trala aprobación da acta da sesión anterior, pasouse á quenda das mocións. A única que saíu adiante foi na que se acordou instar á Consellería de Sanidade a continuar garantindo, en condicións de homoxeneidade e equidade, o acceso aos novos fármacos ás persoas enfermas de hepatite C de acordo cos criterios establecidos para todo o Sistema Nacional de Salud, elaborados por expertos na materia e con arranxo á evidencia científica.

Ademais, e en resposta a preguntas formuladas polos grupos da oposición, José Ramón Martínez Barbeito referiuse á proposta do goberno local que está a valorar o Sergas referida ao traslado do Punto de Atención Continuada (PAC) da Laracha ao recinto do centro sociocultural de Santa Lucía. Actualmente o PAC sitúase nunha das dependencias do centro de saúde. Martínez Barbeito afirmou que “esa sala quedaría liberada para outros usos do centro de saúde”, que ambas instalacións “situaríanse a carón unha da outra e estarían comunicadas, pero terían accesos independentes” cuestión interesante xa que ambas instalacións teñen horarios diferentes, e que “o PAC pasaría a ter un ámbito propio, máis amplo que o actual e cun acceso e área de estacionamento exclusivos para os vehículos de emerxencias”.

En relación ao CEIP Ramón Otero Pedrayo, Martínez Barbeito explicou que o goberno local mantivo recentemente unha reunión co director de obra e representantes da empresa que está construíndo o pavillón do centro de ensino. Nesa xuntanza comunicouse ao Concello que se está avanzando na fabricación da estrutura que posteriormente será instalada no seu correspondente emprazamento. A previsión é que a actuación estea rematada “en dous meses” e, por tanto, non coincidirá coa obra de construción do novo aulario, que será financiada integramente pola Xunta de Galicia.