O Persoal da Área Sanitaria da Coruña pide á Fiscalía que investigue a situación de Urxencias

A Xunta de Persoal da Área Sanitaria da Coruña presentou este xoves un escrito ante a Fiscalía para que investigue a situación na que se presta atención asistencial no servizo de Urxencias do Complexo Hospitalario Universitario A Coruña (Chuac).

Para a Xunta de Persoal, “o máis grave é que estas condicións asistenciais poden ser unha ameaza, un risco para a seguridade dos pacientes”, segundo indicou, en declaracións aos medios, ante o Tribunal Superior de Xustiza de Galicia (TSXG), a voceira da Xunta de Persoal, María Seijo.

“Queremos que sexa a Fiscalía a que investigue, a que comprobe o que dicimos. E que lle busquen solucións porque hai alternativas”, afirmou Seijo, acompañada por varios compañeiros da área sanitaria coruñesa.

Ademais, apelan á “posible vulneración de dereitos fundamentais dos pacientes” e engaden que esta situación “podería ser constitutiva dun delito”, en opinión da Xunta de Persoal, que leva meses denunciando problemas en urxencias e falta de persoal para atender aos pacientes.

Os traballadores alertan que o servizo -as novas instalacións do cal foron inauguradas en maio do ano pasado- sofre unha “masificación inasumible”, un feito que, segundo comentou Seijo, se suma á “estrutura inadecuada” do espazo e ao “déficit de persoal” no servizo.

“VULNERACIÓN DE DEREITOS”

Todo iso, “non asegura a seguridade dos pacientes”, apuntou a voceiro da Xunta de Persoal, que entende que “se están a vulnerar dereitos básicos dos pacientes, como o dereito á intimidade ou á confidencialidade”.

“Como imos garantir a súa intimidade se temos que facer os coidados básicos á vista, non solo doutros pacientes senón tamén de persoas alleas ao paciente. Esta situación non se dá agora por un incremento das infeccións respiratorias, senón que vén dende que se inaugurou este servizo”, alerta Seijo.

A Xunta de Persoal decidiu acudir á xustiza unha vez “esgotadas todas a vías de diálogo e negociación”. “Solo quédanos pedir o amparo, case o auxilio, das instancias xudiciais, que teñen que velar polos dereitos fundamentais e pola seguridade dos nosos pacientes”, asegura Seijo.