O grupo de scouts de Vasco da Ponte coñece o traballo do Centro de Día de AFAL

Visita a Afal Ferrolterra

Unha decena de scouts do grupo Vasco da Ponte de Canido, xunto aos seus monitores, visitaron o pasado venres as instalacións do Centro de día Terapéutico de AFAL Ferrolterra, situado na rúa Río Castro de Ferrol. Segundo explicou a presidenta da asociación, Milagros Prieto, todos eles non só coñeceron de preto as terapias e actividades que o equipo leva a cabo cada día cos usuarios, senón que se implicaron nestas, participando mesmo nalgún dos talleres. A visita, indicou Prieto Gondell, inclúese na política de portas abertas de AFAL Ferrolterra. E, a través desta, a asociación brinda a entidades e particulares a posibilidade de coñecer o centro e, sobre todo, o traballo que desenvolve para mellorar a calidade de vida das persoas enfermas de Alzhéimer. Nos últimos meses, participantes en cursos formativos de AFAL e tamén de accións do Mencer visitaron as instalacións.