O goberno local da Laracha propón ao Sergas separar o centro médico e o PAC

O alcalde do Concello da Laracha, José Manuel López Varela, acompañado polos concelleiros José Ramón Martínez Barbeito (tenente alcalde) e Rocío López (edil responsable da área de sanidade) e técnicos municipais, mantivo unha reunión de traballo no centro sociocultural de Santa Lucía cos técnicos da Dirección Xeral de Investimentos do Servizo Galego de Saúde (Sergas).

Aproveitando que o recinto no que se sitúa a citada instalación sociocultural se sitúa contiguo ao centro de saúde da Laracha, o goberno local pretende readaptar o seu uso para albergar o punto de atención continuada (PAC), e así separar as dúas instalacións médicas, mesmo dispoñendo dunha entrada independente para cada unha delas.

Actualmente o PAC da Laracha ocupa unha das salas do interior do centro de saúde, ámbito que quedaría liberado para outras funcións no caso de ser aceptada a proposta do goberno municipal. Por tanto, o obxectivo final é un mellor aproveitamento dos espazos dispoñibles para unha maior comodidade tanto para os profesionais como para os usuarios de ambas instalacións.

Na súa visita á Laracha os técnicos do Sergas puideron comprobar persoalmente o estado do edificio do centro sociocultural de Santa Lucía, ademais de intercambiar impresións cos membros do goberno local e os técnicos municipais.

Precisamente coa finalidade de separar as instalacións do PAC e do centro de saúde, o Concello da Laracha promoveu a cesión gratuíta ao Sergas tanto do centro sociocultural de Santa Lucía como do seu recinto exterior, medida que foi aprobada polo Pleno en novembro do ano 2010.