O goberno compostelán prevé concretar no primeiro trimestre o alcance da renda social

O alcalde de Santiago, Agustín Hernández, concretou este luns, tras a aprobación definitiva dos presupostos da capital galega para 2015, que o seu equipo prevé definir no primeiro trimestre o “alcance e contido” das medidas que recollerá a nova renda social de solidariedade, a dotación da cal se sitúa en 600.000 euros.

En rolda de prensa, Hernández remarcou que esta renda permitirá “solucionar problemas” de prestación de emerxencia para veciños da cidade que “o están a pasar especialmente mal pola crise”.

Aínda que a dotación inicial é de 600.000 euros, o que a oposición criticou por insuficiente, durante o debate dos presupostos -que ascenden a 102,6 millóns de euros- , o concelleiro de Facenda, Ramón Quiroga, asegurou que os populares traballarán para “incrementala” en función da dispoñibilidade financeira.

“Non é unha partida que vaia estar pechada; imos ver como se liquida o ano e, a partir de aí, veremos se se fai unha nova proposta”, sinalou o edil, para engadir que a “filosofía” do equipo que dirixe Hernández é “aumentar” o gasto social como, ao seu entender, constátase nas contas aprobadas este luns.

Neste sentido, Hernández tamén incidiu no incremento do 18 por cento do gasto social, ao pasar de 7,5 a 9 millóns de euros, así como ao incremento dos recursos reservados para outras accións como integración social ou bolsas de comedores.