O Concerto de Reis clausura a programación de Nadal en Verín

Na xornada de mañá 06 de xaneiro, ás 20 horas, a igrexa da Mercé de Verín acollerá o XXI Concerto de Reis, organizado pola Asociación Verinense de Amigos da Música.

Durante o mesmo, no que colaboran a Comunidade Mercedaria e o Concello de Verín, o Coral de Verín interpretará panxoliñas tradicionais que foron adaptadas e arranxadas polo seu director Edelmiro Mateo. Este concerto, que xa acadou a súa vixésimo primeira edición, clausura o ciclo de actividades lúdicas e musicais programadas polo Concello de Verín e a Asociación de Empresarios de Verín-Centro Comercial Urbano Verín (AEVER-CCU Verín)para as xornadas de Nadal e Reis en Verín.

Por outra banda, o 07 de xaneiro finaliza a sétima edición de ‘Ludonadal’, unha ludoteca dirixida a nenos/as con idades comprendidas entre os 3 e 10 anos, e destinada a incentivar económicamente o comercio tradicional na localidade, facilitar a conciliación dos pais e nais e proporcionar aos/ás nenos/as un espazo de lecer durante as vacacións de Nadal. Para poder acceder a esta actividade, realizada polo Concello de Verín e a Asociación de Empresarios de Verín (AEVER), foi necesario abonar o servizo de ‘Ludonadal’ ou ben entregar un vale, selado pola empresa correspondente, xunto co ticket da compra, á hora de recoller ao menor, e que xustificara a realización de compras nalgún dos establecementos integrados en AEVER.