O Concello da Coruña pon en marcha unha nova edición de Tendas a Exame

O Concello, a través da área de Emprego e Empresa que dirixe Luisa Cid, puxo en marcha a segunda edición de Tendas a Exame, un programa do Proxecto Urbana C cofinanciado ao 80% con fondos europeos Feder para dinamizar, modernizar e ofrecer aos comercios do Agra do Orzán asesoramento gratuíto en técnicas e estratexias comerciais co fin de mellorar as vendas e reactivar os seus negocios. O programa, que finaliza o 30 de marzo, consta de tres fases (captación, diagnóstico e plan de traballo) nas que os expertos deberán visitar os establecementos do barrio, emitir diagnósticos dos negocios adheridos ao programa (considérase a inclusión de 15 locais) e buscar fórmulas para mellorar a imaxe.

Durante os tres meses do programa analizaranse aspectos como o grao de utilización das novas tecnoloxías, publicidade, imaxe e promoción ou servizos ao cliente e poñeranse en marcha en cada un dos comercios as accións de mellora aprobadas polo equipo de técnicos. O asesoramento gratuíto aos participantes realizarano titores e abordará mercadotecnia, área económica-financeira, xestión de compras e loxística, innovación no comercio e xestión de calidade nos comercios que o desexen.

Cada unha destas áreas dispoñerá dun consultor experto que estará co comerciante durante seis días, de luns a sábado, e durante toda a xornada laboral. Así mesmo, tamén se realizará un seguimento online con sesións tutorizadas e de grupo en función dos casos e grao de coñecemento de internet. Todas estas accións irán acompañadas de traballos de orientación e mellora en escaparatismo.

TEATRO NA RÚA CON MANICÓMICOS

Para lograr a maior difusión do programa editáronse folletos e cartelería que se distribuirán polo Agra do Orzán, accións de promoción que se completarán coa actuación do grupo Manicómicos, que realizarán unha acción de teatro-fórum na que se escenificarán as carencias e problemas do pequeno comercio co fin de captar a atención do público. Haberá dúas representacións na rúa Barcelona o próximo 30 de xaneiro, ás 17.00 e 20.00 horas.

Coa posta en marcha de Tendas a Exame II, a área de Emprego e Empresa que dirixe Luisa Cid reafirma a súa aposta pola reactivación da vida comercial no Agra do Orzán apostando por proxectos innovadores. “Os comercios son o reflexo dos seus barrios e hai que buscar fórmulas para promover a pervivencia de negocios de toda a vida xunto coa creación de novas empresas”, explica Cid.

A segunda edición do programa Tendas a Exame conta cun presuposto de 35.750,83 euros e ponse en marcha tras finalizar o primeiro programa cun nivel de éxito do 97%, con 40 diagnósticos e con 2.448 accións de mellora.