O centro de emprego de Ferrol conta coa homologación da Xunta para impartir tres novos cursos con certificado de profesionalidade

A concelleira de Emprego do Concello de Ferrol, Martina Aneiros Barros, deu conta hoxe da resolución da Xunta de Galicia pola que se acredita ao Centro Municipal de Emprego a homologación para impartir tres novas accións formativas con nivel 2 de certificado de profesionalidade. Este foi un dos temas abordados esta mañá na comisión informativa de Economía, Facendo, Emprego e Recursos Humanos.

Así as cousas, os novos cursos que o Centro de Emprego poderá impartir serán: operacións auxiliares de servizos administrativos e xerais, operacións de gravación e tratamento de datos e documentos, e atención sociosanitaria a persoas dependentes en institucións sociais. Segundo explicou a concelleira de Emprego, estas homologacións permitirán que o Concello de Ferrol poidan optar ás subvencións programadas anualmente neste ámbito pola Xunta de Galicia.

A edil Martina Aneiros destacou que esta medida “pretende incrementar os recursos que presta o centro e adaptalos ás necesidades do mercado laboral”. Así mesmo, lembrou o recoñecemento obtido o pasado verán para impartir cursos de competencias clave ao tempo que as accións formativas de comunicación en lingua galega, comunicación en lingua castelá e competencia matemática. “Arredor dun 90% dos alumnos superaron estes cursos o que lles permitirá acceder agora a esta nova formación con certificado de profesionalidade de nivel 2 e mellorar as súas condicións de empregabilidade”, engadiu a edil ferrolá.