O alcalde do Carballiño nega que se ocultase documentación

O alcalde do Carballiño, o popular Argimiro Marnotes, defendeu o dereito de “presunción de inocencia” do que foi rexedor desta localidade e exsecretario do PSdeG, Pachi Vázquez, a quen o Tribunal Superior de Xustiza de Galicia (TSXG) procesa para indagar sobre un suposto delito de prevaricación continuada pola contratación de 37 persoas.

En todo caso, Marnotes afirmou que o Concello entregou “toda a documentación” da que dispón cando lla pediu o fiscal e, posteriormente, o TSXG, e indicou que se Pachi Vázquez ten documentos “que non están no rexistro” da Casa do concello, sería el o que ten que dar explicacións ao respecto.

Así, o rexedor carballinés indicou que “nin o alcalde, nin os membros do equipo de goberno preguntaron, nin deron instrucións nin nada” cando se requiriu a información ao Concello, e que a persoa encargada de recompilar os documentos foi a secretaria municipal, que tivo a “colaboración” doutros empregados, precisamente -engadiu-, algún cuxo contrato forma parte da investigación.

Marnotes incidiu en que o equipo de goberno nunca levou documentos á fiscalía nin denunciou ningún caso, senón que foron as dilixencias da xustiza motu propio as que derivaron nesta situación. “Todo o contrario, deséxolle a mellor das sortes”, indicou.

Para apoiar o dito, recordou que o avogado do Concello nin sequera foi a “ningunha testifical”, porque, agregou, a Casa do concello “non ten ánimo de acusación”.

Na mañá deste mércores, Pachi Vázquez acusou á Casa do concello carballinés “de ocultar todo, voluntaria ou involuntariamente”, en relación aos 37 contratos formalizados cando era alcalde da localidade.