O alcalde de Ourense pregúntase como se repara o dano causado

O alcalde de Ourense, Agustín Fernández, preguntouse “quen pedirá desculpas e como se repara o dano causado”, tras ser desimputado no auto xudicial sobre as asistencias técnicas do Concello de Ourense, que comezou en outubro de 2013 pola denuncia de CIG e USO.

Nun audio remitido polo Concello, o alcalde Agustín Fernández alude ao auto xudicial que mantén as imputacións ao exalcalde Francisco Rodríguez e á exedila de Urbanismo Áurea Souto polas asistencias técnicas, para relatar “o enorme custo persoal, custos políticos e económicos e enormes danos á imaxe e económicos, do municipio, ademais do dano aos funcionarios que se viron implicados”.

O xuíz instrutor, antes do seu auto coñecido este martes, con dous imputados, chamou a declarar con esa cualificación a once edís e directores xerais do Goberno bipartito local, entre os anos 2008 e 2013, en relación a contratos de asistencias técnicas feitos a cinco traballadores que xa son fixos no concello, tras levar a rescisión dos seus contratos ao xulgado do social.

Na súa valoración do auto xudicial, o rexedor de Ourense recordou tamén que tanto el coma os demais imputados tiveron que “soportar varias imputacións, martirio mediático, paseíño xudicial”.

“Agora ao ir arquivándose os casos, pregúntome se alguén pedirá desculpas e como se pode reparar o dano causado, pero isto debería facer reflexionar sobre a presunción de inocencia e sobre que non somos todos iguais, e hai que esperar a que os xuíces se pronuncien”, engadiu.

APOIO A IMPUTADOS

Fernández engadiu na súa declaración un “apoio expreso” ao exalcalde e á súa “compañeira” Áurea Souto. Dixo confiar “plenamente” na súa inocencia e estar seguro de que o seu caso ” se vai a arquivar” polo que pediu para eles “que se respecte a súa presunción de inocencia”.

Tras o auto coñecido este martes, o alcalde queda libre da última imputación que tiña en sede xudicial, mentres que o exalcalde Francisco Rodríguez, suma a de delito continuado de prevaricación nas asistencias técnicas, a da Operación Pokémon.

No caso da exedila Áurea Souto -que deixou cargo e acta nas últimas semanas- é a segunda, que se engade á relacionada co caso da praza de San Antonio, no que xa conta con auto de apertura de xuízo oral.