José Blanco di estar convencido da inocencia de Pachi Vázquez

José Blanco

O eurodeputado do PSOE José Blanco está “absolutamente convencido” da inocencia do exsecretario xeral do PSdeG e actual deputado autonómico, Pachi Vázquez, e recorda que a Fiscalía tamén pediu o seu procesamento –o de Blanco– por tráfico de influencias e que, finalmente, o caso foi arquivado.

   “Tamén a Fiscalía pediu que se me puidese abrir un proceso de xuízo, polo tanto de procesamento, por tráfico de influencias”, subliñou Blanco en rolda de prensa en Santiago, xusto antes de recordar que, finalmente, a sala correspondente “arquivou o caso”.

   Estas palabras do parlamentario europeo prodúcense despois de que, o pasado xoves, a Fiscalía solicitase ao Tribunal Superior de Xustiza de Galicia (TSXG) o procesamento de Pachi Vázquez por un posible delito de prevaricación continuada durante a súa etapa como alcalde do Carballiño (Ourense), entre os anos 1995 e 2005.

   Con todo, Blanco cre que Pachi Vázquez respectou “as regras, as normas e os procedementos” durante a súa etapa como rexedor do Carballiño, período no que a Fiscalía sostén que interveu na contratación irregular de 37 persoas dende 1999 e, en especial, entre 2003 e 2005.

   Tamén se referiu o eurodeputado socialista ás palabras do secretario xeral do PSdeG, José Ramón Gómez Besteiro, quen advertiu este venres de que Pachi Vázquez tería que dimitir en caso de ser xulgado. A este respecto, asegurou que o criterio empregado polo seu partido é a forma que “mellor compatibiliza o dereito á presunción de inocencia coa preservación do crédito das institucións”.

   Por todo iso, o eurodeputado socialista José Blanco, tras poñer como exemplo o seu precedente persoal e confiar na inocencia de Pachi Vázquez, avogou por “esperar”.