Feijóo deséxalle sorte a Pachi Vázquez e que se aclare canto antes o que fixo na época de alcalde

O presidente da Xunta, Alberto Núñez Feijóo, desexou ao deputado socialista e exsecretario xeral do PSdeG Pachi Vázquez “sorte e que se aclare canto antes o que fixo durante á súa época de alcalde”, despois de que a Fiscalía pedira que sexa procesado en relación a un suposto delito de prevaricación continuada durante á súa etapa como alcalde do Carballiño (Ourense).

En concreto, a Fiscalía aprecia “relevantes e significativos indicios racionais de criminalidade” do exsecretario xeral do PSdeG e actual deputado autonómico e, por iso, solicitou ao Tribunal Superior de Xustiza de Galicia (TSXG) o seu procesamento por un suposto delito de prevaricación continuada cando foi alcalde do Carballiño entre os anos 1995 e 2005.

Durante unha visita ao Centro de Negocios de Porto do Molle, en Nigrán (Pontevedra), Feijóo puxo en relevo a “transcendencia na comunidade autónoma” de Pachi Vázquez, a quen definiu como “unha persoa importante dende o punto de vista político e unha das persoas máis importantes do Partido Socialista en Galicia”.

“Aínda que só sexa como antigos rivais políticos, hoxe compañeiros no Parlamento, deséxolle toda a sorte e que poida acreditar nos xulgados que as súas condutas en materia de contratación pública, de contratación de persoal, se axustan” á legalidade, concluíu o máximo mandatario galego.