Deteñen a unha muller en Vigo que roubou dúas gaitas valoradas en 5.000 euros do interior dun coche

Axentes do Corpo Nacional de Policía da Comisaría de Vigo deteñen a unha muller de 37 anos de idade, de nacionalidade portuguesa e sen domicilio coñecido, como presunta autora dun roubo con forza, tras subtraer varios efectos do interior dun coche, entre eles, dúas gaitas valoradas en case 5.000 euros.

Segundo informaron fontes policiais, os feitos tiveron lugar o pasado 16 de xaneiro, cando a vítima foi recoller o seu coche unha mañá á Rúa Alta, onde estaba estacionado. Ao chegar comprobou que alguén forzara o vehículo e que do maleteiro faltaban varias cousas, entre elas dous gaitas.

Grazas á investigación policial puídose localizar os instrumentos nunha tenda de compravenda de obxectos de segunda man, e identificouse a posible ladroa.

A muller foi localizada por unha dotación policial na mañá do martes e foi trasladada a Comisaría, onde se comprobou que lle constan 24 antecedentes policiais, varios por roubo con forza. As gaitas foron devoltas ao seu dono e as dilixencias foron postas en coñecemento do xulgado de instrución número 3 de Vigo.