Caión preséntase en Fitur como “A porta da Costa da Morte”

Presentación de Caión en Fitur

O Concello da Laracha foi hoxe protagonista no stand de Galicia do salón da Feira Internacional de Turismo (Fitur) que se está a celebrar nas instalacións do IFEMA, en Madrid.

Esta mañá realizouse a presentación titulada “Caión, puerta de la Costa da Morte”, na que se fixo un percorrido por todas as oportunidades turísticas que ofrece o noso municipio, centrándoas na localidade costeira que marca o inicio do xeodestino Costa da Morte.

Pedro Tasende, representante da empresa que realizou os proxectos Mar de Caión e Descubre o mar –ambos con financiamento dos Grupos de Acción Costeira-, foi o encargado de dirixir a presentación das imaxes e do vídeo promocional no que se destacaron as fermosas paisaxes e os completos servizos que ofrece ao visitante a vila de Caión. Ademais da praia –con bandeira azul- e o paseo marítimo –tamén co recoñecemento de sendeiro azul-, destacouse a oferta gastronómica de calidade que se ofrece nos locais integrados na rede de hostaleiros, a existencia dun porto equipado para o amarre de embarcacións deportivas e de recreo e a posibilidade de practicar diversos deportes náuticos.

Tamén houbo tempo para poñer en valor os museos do Arquivo da Pesca de Caión e do Centro de Interpretación dos Muíños de Auga da Costa da Morte de Golmar, as celebracións que contan co recoñecemento de Festa de Interese Turístico (a Romaría dos Milagres de Caión e a Feira das Cereixas de Paiosaco) e para facer referencia á importancia histórica do municipio, poñendo como exemplo o mosteiro de San Pedro de Soandres.

Trala intervención de Nava Castro, Directora Xeral de Turismo, o alcalde, José Manuel López Varela, pechou a presentación referíndose á “enorme responsabilidade” que ten o Concello da Laracha, pola súa posición xeográfica, “de dar a benvida á maioría das persoas que visitan a comarca de Bergantiños e a Costa da Morte”. O rexedor municipal salientou que “o noso gran logro foi saber integrar a oferta turística nos medios urbanos, facéndoos atractivos para os visitantes, pero tamén funcionais e cómodos para os veciños”. Como exemplo, citou as ampliacións do paseo marítimo e do porto de Caión, a renovación do Rueiro das Figueiras e do barrio de San Roque, a creación dos paseos fluviais do Anllóns e do Vilán e tamén as actuacións que se desenvolven no recinto feiral de Paiosaco.

López Varela, non sen antes agradecer á Xunta e a Turgalicia a posibilidade de estar presentes no stand de Galicia de Fitur, animou a visitar o Concello da Laracha para disfrutar “do mundo por descubrir que se ofrece ao turista desde as verdes terras do Anllóns ata os maxestuosos cantís de Caión”.