Caballero asegura que o referendo reclamado polos opositores ao barco na rotonda custaría dous millóns de euros

O alcalde de Vigo, Abel Caballero, advertiu este venres de que o referendo que reclaman os opositores ao barco ‘Bernardo Alfageme’ na rotonda de Coia custaría uns dous millóns de euros, bastante máis que os 100.000 euros que custa, segundo explicou, a instalación do pesqueiro.

En declaracións aos medios, o rexedor afirmou que os que rexeitan ese proxecto “piden un referendo” por unha obra de 100.000 euros” e convocalo “custaría uns dous millóns”. “¿De qué disparate falan?”, preguntou.

Así mesmo, insistiu en cualificar como “político” ese movemento de rexeitamento, e repetiu que, tras as protestas, están sindicatos como CIG, CUT ou CNT, “coñecidos polo seu radicalismo”; e partidos como BNG, IU, Equo, Podemos, Anova, AGE ou Piratas de Galicia, formacións que, “como non teñen apoio electoral, teñen que montar lea”.

“O barco se vai a poñer porque é bo para a cidade, é a nosa homenaxe ás xentes do mar, e un factor de embelecemento da cidade”, subliñou Caballero quen, fronte á esixencia destes movementos de que se destine máis diñeiro a acción social, recordou que o Concello olívico dedica 28 millóns a políticas sociais.

 O rexedor criticou os que rexeitan a instalación do pesqueiro, que “saben que non teñen ningún apoio cidadán” e, segundo Caballero, fan unha “campaña de destrución do progreso de Vigo”.