Augas de Galicia considera “non apta” a parcela proposta en Montemaior para recibir lodos de depuradora

O organismo Augas de Galicia vén de emitir un informe no que considera que a parcela da parroquia de Montemaior que se propuxera como posible receptora de produtos de tratamento de lodos de depuradora (PTLD) non é apta para tal fin, como alegara recentemente o Concello da Laracha.

Así o confirmou a Dirección Xeral de Xestión do Dominio Público Hidráulico no escrito oficial remitido ao alcalde da Laracha, José Manuel López Varela, indicando que para chegar a dita conclusión previamente foi preciso realizar unha análise na que se tiveron en conta posibles afeccións directas ou indirectas que a aplicación dos lodos poderían supoñer sobre o medio hídrico ou sobre os espazos protexidos do Plan Hidrolóxico Galicia-Costa.

A parcela en cuestión sitúase na parroquia de Montemaior, moi preto do límite co termo municipal de Carballo, en concreto na zona coñecida como As Seixiñas. O Concello da Laracha entendía que polo seu emprazamento, nas inmediacións de varios afluentes do río Bradoso, a finca non era apta para recibir os lodos. O informe de Augas de Galicia, por tanto, deu a razón ao goberno local e retirará a parcela da listaxe exposta no Diario Oficial de Galicia (número 229 do 28 de novembro de 2014) pola Dirección xeral de Produción Agropecuaria como posible receptora de PTLD.

O Concello da Laracha deu traslado deste informe de Augas de Galicia ao Concello de Carballo, tamén afectado pola proximidade da citada finca co límite entre ambos termos municipais.