A terceira xornada Xogatlon de atletismo resultou moi frutífera

Celebrouse no CGTD de Pontevedra, a terceira xornada do Xogatlon de atletismo, competición dirixida aos alumnos da Escola Municipal de Atletismo e doutros centros escolares, onde se prima a formación máis que a competición.

Nesta ocasión disputáronse as probas de triplo salto, lanzamento de disco e 50 ou 60 metros valos, segundo a idade. Preto dun centenar de atletas foron os que competiron nesta ocasión, dende a categoría benxamín ata a cadete, todos eles dirixidos polos seus monitores e voluntarios da Sociedade Ximnástica, que levaron a cabo o programa previsto nos 60 minutos de duración do evento. En dúas semanas terá lugar a penúltima xornada do Xogatlon da que daremos ampla información.

Os atletas da Sociedade Ximnástica afían as espadas de cara á Copa do Rei cun Record do Clube

O próximo sábado asómase para a Ximnástica a Copa do Rei de atletismo, un dos obxectivos importantes da tempada para a veterana Sociedade.

Os atletas pontevedreses realizaron as súas últimas competicións demostrando que afrontan a Copa dispostos a todo. Para empezar viviuse un bonito duelo na distancia en Valladolid e Antequera, na capital castelá Manuel Molinos mellorou o record do Clube de salto de altura con 2,09; pero minutos despois, Lysvanys, na localidade malacitana, mellorouno un centímetro con 2,10; colocándose ademais cuarto do ranking nacional baixo teito.

Tamén en Antequera actuou Alberto Salcedo, correndo o dobre hectómetro en 21.43, un gran rexistro que lle coloca o terceiro de España no ranking. Outro atleta que tamén fixo unha respectable marca foi David Martínez, que correu os 1.500 metros en Valencia, con 3.48.52, colocándose o cuarto do ranking nacional. En Madrid competiron Sergio García e Gonzalo Sánchez, o primeiro nos 800 metros, onde asinou 1.54.40 e o segundo na velocidade curta dos 60 metros, con 7.06. Por último regresamos a Valladolid, xa que ademais de Muíños, Alejandro Otón parou o crono nos 60 metros valos, en 8.25 e Manuel Castellanos lanzou a xavelina ata uns magníficos 59 metros.