A Tempada Lírica da Coruña programa a estrea en Galicia de ‘Attila’ para este sábado

A Tempada Lírica da Coruña incluirá este sábado, día 17, a estrea en Galicia, no Pazo da Ópera, de ‘Attila’, a composición de Giuseppe Verdi, segundo informa a organización.

A ópera, en versión concerto, contará con “primeiras figuras internacionais, o Coro Gaos e a Orquestra Sinfónica de Galicia, todos baixo a dirección da canadense Keri-Lynn Wilson”, engade.

A Tempada Lírica, que organizan o Consorcio para a Promoción da Música e Amigos da Ópera da Coruña, ofrece esta única ópera, “un dos títulos máis importantes do primeiro Verdi, posterior a Nabucco, e estreado en La Fenice de Venecia”, precisan os seus organizadores.

Entre outros, intervirán o baixo brasileiro Luiz Ottavio Faria; a soprano, Ekaterina Metlova; o barítono Juan Jesús Rodríguez, e o tenor mexicano Héctor López, que substituirá o previamente anunciado Piero Pretti, que debeu suspender a súa actuación por enfermidade.

A Sinfónica de Galicia e o Coro Gaos estarán baixo as ordes de Keri Lynn Wilson, que iniciou a súa carreira como asistente de Claudio Abbado.