Enviar a un amigo
Opinar
ImprimirA operación contra o narcotráfico en Arousa aumenta a 16 o número dos detidos
Os detidos en relación ao alixo de 1.500 quilos de cocaína descubertos a bordo do barco ‘Coral I’ elévanse a 16 e comezarán a pasar este xoves a disposición do Xulgado de Instrución número 3 de Cambados.
Segundo informaron fontes da investigación, son, polo menos, 16 as persoas detidas nesta operación que segue aberta. Nove delas navegaban a bordo do barco pesqueiro de bandeira venezolana que foi abordado polo buque ‘Petrel’ do Servizo de Vixilancia Aduaneira (SVA) en pleno océano Atlántico. O resto foron detidos en terra, na súa maior parte na bisbarra de Arousa.
O ‘Coral I’ foi interceptada nunha operación desenvolvida conxuntamente por axentes do Grupo de Resposta Especial para o Crime Organizado (Greco) e do SVA.
Segundo confirmaron, os 1.500 quilos de cocaína achados no pesqueiro, distribuídos en 49 fardos, xa foron trasladados a terra se ben se mantén en segredo cal foi o porto ao que foi trasladado. Tampouco se coñece de momento o lugar no que arribará o ‘Coral I’ nin a súa data de chegada.
Aínda que de momento non hai confirmación oficial, ao estar o operativo baixo segredo de sumario, todos os indicios apuntan a que a operación para introducir os 1.500 quilos de cocaína a través das costas galegas estaba dirixida polo cambadés Rafael Bugallo, ‘O Macho’. De feito axentes do Greco realizaron o martes minuciosos rexistros tanto no chalé ‘O Mulo’ ten en Cambados como nun piso da súa propiedade en Vilagarcía de Arousa.
BUSCA
Sobre Rafael Bugallo pesaba unha orde de busca e captura despois de que non regresase a prisión tras un permiso penitenciario. Foi a última das moitas escaramuzas que as forzas de seguridade atribúen a ‘O Mulo’, vinculado co tráfico de estupefacientes dende a década dos 90.
Tamén foi obxecto dun rexistro un chalé de Vilanova de Arousa, propiedade de J.C.N.O., un empresario de 43 anos vinculado co sector da acuicultura e sen antecedentes en cuestións relacionadas co narcotráfico, pero ao que as forzas de seguridade vinculan coa operación.
