A neve deixa sen clase a 810 alumnos de 20 centros lucenses

A presenza de neve ou xeo na calzada da rede viaria luguesa deixou sen clase este luns a 810 alumnos de 20 centros educativos da provincia de Lugo.

Segundo informou a Consellería de Educación, a maior parte de incidencias debido ao tempo rexistrouse en zonas de montaña, onde quedaron sen poder chegar ás aulas 649 estudantes de 15 centros.

En concreto, os centros afectados localízanse en municipios de montaña como Navia de Suarna, Pedrafita do Cebreiro, Becerreá, Cervantes, Folgoso do Courel e A Fonsagrada.

Tamén se rexistraron incidencias na zona centro, con 161 alumnos de cinco centros educativos afectados, nas localidades de A Pastoriza e Muras, segundo engadiu Educación.