A Laracha mellorará a atención á cidadanía trasladando servizos sociais ao novo edificio administrativo

O departamento de servizos sociais da Laracha está a ser trasladado ao completo ao primeiro andar do novo edificio administrativo, situado no número 60 da Avenida Fisterra e a escasos douscentos metros da Praza do Concello e da Casa Consistorial. Ao longo da fin de semana ultimarase a posta en funcionamento dos equipos informáticos e do mobiliario. A partir do luns os profesionais adscritos a este departamento atenderán ao público xa nas novas dependencias.

Deste xeito o Concello da Laracha facilitará a labor dos traballadores e mellorará a atención á cidadanía, xa que as instalacións do edificio administrativo son máis modernas e funcionais, ademais de contar cunha cómoda sala de espera e un maior espazo para atender de xeito independente e confidencial aos veciños.

Por tanto, desde o luns deberanse dirixir ao novo edificio administrativo todas as persoas que desexen contactar ou teñan concertada cita con calquera dos traballadores municipais adscritos ao departamento de Servizos Sociais.

O novo edificio administrativo alberga desde hai meses as dependencias da Policía Local, o Centro de Información ás Mulleres e o servizo de orientación laboral, ademais do Obradoiro A Laracha-Arteixo: Colaborando polo emprego II. En próximas datas o Concello da Laracha tamén ten previsto trasladar a Axencia de Emprego e Desenvolvemento Local.