A Guarda promove o concurso de debuxo “Fomenta a reciclaxe 2015″

A Guarda é un concello implicado na reciclaxe dos residuos urbanos grazas á colaboración dos veciños. Para continuar coa campaña de educación ambiental a Concellería de Medio Ambiente promove unha nova actividade entre os escolares do municipio.

A comezos de xaneiro de 2015 trasladouse a todos os centros escolares a invitación e as bases deste concurso que está dirixido ós alumnos de 5º e 6º de Primaria e de 1º e 2º de ESO da Guarda.

A temática dos debuxos é a recollida selectiva dos residuos urbanos, a separación dos lixos nos distintos colectores: orgánico, plásticos, papel e cartón, vidro e aceites domésticos. As bases están dispoñibles nos centros escolares e os nenos e rapaces interesados poden presentar ata un máximo de 4 carteis en tamaño A4.

O prazo para presentar os debuxos remata o 30 de xaneiro. O premio para o debuxo gañador é un vale de 100 € e agasallos para os compañeiros de clase.

Todos os carteis presentados formarán parte dunha campaña de concienciación “FOMENTA A RECICLAXE 2015” e todos os veciños poderán contemplar os carteis.