A Fiscalía considera que se respectaron os dereitos do ladrón do Códice

O fiscal Antonio Roma opúxose ás nulidades solicitadas pola defensa do ladrón confeso do Códice Calixtino, José Manuel Fernández Castiñeiras, e da súa muller e fillo, dado que, na súa opinión, “se respectaron os dereitos fundamentais” dos acusados durante a instrución.

Na súa intervención durante a primeira sesión do xuízo que se celebra nos xulgados de Santiago polo roubo do Códice, dedicadas este luns a dirimir cuestións previas, o fiscal explicou que “non atopa” os “fundamentos” esgrimidos pola defensa para pedir a nulidade do procedemento e considerou que “non se poden estimar as cuestións previas” reclamadas pola letrada da defensa, Carmen Ventoso.

En concreto, o fiscal sinalou que cuestións como a recusación do xuíz instrutor ou a nulidade de todas as actuacións xa foron analizadas e concluída no seu momento pola Audiencia Provincial. “Se está resolto, está resolto”, indicou o Ministerio Fiscal.

Por outra banda, criticou que a defensa pida que se declare nula a declaración e confesión do acusado por “elementos de forma”, cando “as respostas” de Fernández Castiñeiras “non son nulas” e existían outros “elementos incriminatorios”. Do mesmo modo, defendeu que os rexistros son correctos e se fixeron en presenza dos avogados.

O fiscal tamén defendeu as gravacións na Catedral. En concreto, asegurou que o despacho do Cabido é unha “zona restrinxida, non de acceso público”, polo que estas gravacións son válidas, e no caso das cámaras do claustro, non identificadas, recordou que o acusado “na súa confesión, manifesta que sabe onde están situadas as cámaras”. “Se xa o sabe, non se pode dicirse que exista unha lesión aos seus dereitos”, sentenciou.

GRAVACIÓNS NA CASA

Por outra banda, o Ministerio Fiscal considera válidas as gravacións sonoras na casa dos acusados baseándose na “transcendencia” do proceso e no feito de que existían indicios.

“Este é un procesamento transcendente, a sociedade non autorizase un cruzamento de brazos por parte das autoridades”, explicou Roma, para quen é “unha acusación demasiado grave” dicir que existe un “rexistro encuberto ou unha entrada susceptible de delito” neste acto.

Finalmente, mantívose alleo ás acusacións de “imparcialidade” ao xuíz instrutor, alegando que a sala debe ser “allea” ao “estado de opinión creado”, dado que o proceso xa non se atopa en fase de instrución.