A Escola Infantil Municipal de San Sadurniño publica a lista provisional de admitidos

O departamento de Igualdade fixo público este mediodía o listado de admisións provisionais da Escola Infantil Municipal, dentro do procedemento especial de matrículas iniciado polo Concello co gallo da apertura do centro. En total hai 19 solicitudes -todas elas admitidas- máis unha presentada fóra de prazo que, de acordo co regulamento da EIM, ten que incluirse na lista de agarda malia haber prazas dispoñibles.

Trátase dun requisito administrativo que é necesario cumprir, dado que calquera solicitude presentada fóra dos prazos oficiais debe considerarse como parte da lista de agarda e resolverse unha vez que se tramiten as que si se presentaron a tempo. Ademais, o propio regulamento de funcionamento da escola sinala que as vacantes se adxudicarán a medida que se vaian producindo e seguindo rigorosamente a orde de puntuacións obtidas polas persoas que formen parte desa lista. Sen embargo tamén cómpre ter en conta que nesta fase de posta en marcha do centro hai prazas dabondo en todas as unidades, polo que -en principio- a única solicitude presentada fóra de prazo debería ter asegurado o acceso.

En calquera caso -e aínda estando admitidas todas as solicitudes presentadas en prazo- é necesario abrir un prazo de reclamacións, que se prolongará desde o 19 ao 24 de xaneiro. O listado definitivo de admisións publicarase o día 26 de xaneiro.

Se se confirman todas as peticións presentadas, o centro abrirá as súas portas o luns 2 de febreiro con 20 nenos e nenas: 9 na unidade de un a dous anos, 9 na unidade de dous a tres e dúas meniñas na unidade de cero a un ano, procedentes de San Sadurniño, Narón, Moeche, As Pontes e As Somozas