A Deputación da Coruña colabora con Farmamundi para mellorar a atención médica nos países latinoamericanos

O presidente da Deputación da Coruña, Diego Calvo, vén de asinar un novo convenio de colaboración con Farmamundi (Farmacéuticos Mundi) polo que axuda á implantación dun sistema racional de uso de medicamentos no Salvador. A institución provincial colaborou con 19.163,04 euros (o 58% do custo total) na compra de material e equipamento que mellore a almacenaxe nos hospitais da rede nacional do país.

En concreto, con esta achega comprouse un refrixerador e aparatos de aire acondicionado para a conservación destes medicamentos, permitindo así facer un uso racional destes. Esta acción enmárcase dentro dun proxecto de Farmamundi que se prolongou tres anos para fortalecer o sistema nacional de fármacovixilancia no Salvador. A iniciativa contemplaba a detección, avaliación e prevención de reaccións adversas, fallos terapéuticos e de calidade dos medicamentos.

Esta non é a primeira vez que a Deputación colabora con esta organización. Un dos últimos proxectos que se levou a cabo con fondos provinciais foi un programa para facilitar o acceso de mulleres de Nicaragura á atención primaria de saúde e a medicamentos básicos.

Así, durante a sinatura deste último convenio, a voceira de Farmamundi, Beatriz Villarquide Vega, mostrouse moi agradecida pola colaboración que a Deputación da Coruña vén desenvolvendo cos seus proxectos internacionais que permiten mellorar a calidade de vida de centos de persoas en países subdesenvolvidos.