A Coruña aspira a reunir 12.000 corredores nas tres grandes carreiras de 2015

Presentación do evento deportivo

O concelleiro de Deportes, Francisco Mourelo, acompañado polo campión de España de Maratón, Pedro Nimo, presentou esta mañá a imaxe das probas Coruña21 e Coruña42. Ao acto tamén asistiron Isidoro Hornillos, presidente da Federación Galega de Atletismo; Pati Blanco, responsable de relacións externas de El Corte Inglés; e Mariel Padín, vicepresidente da Deputación. “Como podedes ver, seguimos a liña de anos anteriores con mensaxes como “A metade mola máis” ou “Aquí corremos así”, xunto con outras frases de alento e ánimo dirixidas aos participantes. A principal novidade é que promovemos conxuntamente a imaxe de ambas as dúas carreiras, 2 das 3 máis importantes da cidade,” explicou o concelleiro.

Francisco Mourelo recordou que A Coruña segue dando pasos no camiño para consolidarse como referente do noroeste español do mundo deportivo e, en concreto, nas carreiras populares, xa que a clasificación da Real Federación Española de Atletismo reflicte o ascenso do 20º posto ao 12º de Coruña10; o paso do 20º ao 6º de Coruña21; e o sétimo posto para Coruña42: “Estas clasificacións teñen un gran mérito xa que un dos factores que se ten en conta é a antigüidade no calendario nacional e Coruña21 e Coruña42 cumprirán 7 e 4 edicións, respectivamente, en 2015”.

Ademais explicou que o número de participación cada vez é maior: Coruña10 multiplicou por 5 o número de participantes, mentres que Coruña21 os duplicou e a absoluta de Coruña42 se mantén en torno aos 1.000 corredores. Como obxectivos para este 2015 formúlanse alcanzar os 12.000 participantes entre todas as probas (incluídas a carreira paralela dos 10 quilómetros de Coruña42); aumentar a afluencia de corredores procedentes doutras comunidades autónomas e Portugal; consolidar Coruña42 como o referente dos maratóns do noroeste peninsular; seguir medrando a porcentaxe da poboación que adquire hábitos de vida activa; e medrar un 5% en participación feminina.

Mourelo recordou que aínda está aberto o prazo de inscrición para ambas as dúas carreiras -que se celebrarán o 22 de febreiro e o 19 de abril-, e que esta vai a bo ritmo con 616 inscritos en Coruña21 e 1.500 en Coruña42. Pecharase o prazo o 17 de febreiro e o 5 de abril, respectivamente, e dende o próximo luns poderase realizar a inscrición de forma presencial nas dependencias de El Corte Inglés, sumándose á opción das webs www.coruna.es/carreraspopulares e wwww.carrerasgalegas.com.

Con respecto a Coruña21, a primeira das probas que se celebrará na cidade, o 22 de febreiro ás 10.00 horas, a principal novidade é o circuíto, que se disputará a unha única volta: “Respéctanse as características de circuíto chairo e rápido pasando polas zonas máis emblemáticas da Coruña e resaltando a beleza dunha cidade rodeada de mar”, asegurou.

O recorrido comeza en O Parrote e pasa pola Mariña, Cantóns, praza de Ourense, Liñares Rivas, Primo de Rivera, Palloza, avenida do Exército, Ramón e Cajal, avenida Salgado Torres, rotonda de Lonzas, e volta por Salgado Torres, Ramón e Cajal, Alcalde Marchesi, rolda de Outeiro, estrada do Porto, rotonda de Oza, estrada do Porto, avenida do Exército, Palloza, Primo de Rivera, Liñares Rivas, praza de Ourense, praza de Mina, Juana de Vega, praza de Pontevedra, avenida Barrié de la Maza, avenida Bos Aires, praza de Portugal, paseo de Rolda, Escravas, Manuel Murguía, paseo de Rolda, San Roque de Afuera, Gerardo Porto, Millenium, Gerardo Porto, San Roque de Afuera, paseo de Rolda, Escravas, paseo de Rolda, avenida Bos Aires, Barrié de la Maza, paseo marítimo, rotonda de Adormideras, paseo marítimo, As Ánimas e O Parrote.

“Fiel ao noso lema ‘Correr é máis que correr’ o 10% da inscrición de Coruña21 destinarase ao proxecto de Axuda en Acción contra a pobreza infantil, que apoia máis de 9.000 nenos e nenas de 30 centros escolares,” avanzou Mourelo, quen informou de que os corredores poden realizar achegas solidarias e que existirá un número cero para achegas externas.

O concelleiro explicou que, ademais de converter A Coruña en referente do deporte, un dos obxectivos destas carreiras populares é o de implicar a toda a poboación e fomentar hábitos de vida saudables ligados á práctica deportiva. Neste sentido, anunciou que, de forma paralela ás carreiras, se organizarán actividades de animación, conferencias, feiras e outras novidosas propostas. Mourelo aproveitou para agradecer Pedro Nimo a súa presenza: “Non só é unha honra para A Coruña que compitas nestas carreiras populares, senón que para os participantes vai ser moito máis que un referente”, sinalou o concelleiro, quen anunciou que o atleta correrá Coruña21 como lebre dos populares marcando un tempo que elixirán a través das redes sociais: “O noso obxectivo segue sendo mellorar a calidade de todas e cada unha das citas deportivas coruñesas, organizando eventos que sexan sostibles e sobre todo que impliquen a participación de toda a cidadanía. Estamos seguros de que entre todos conseguiremos que 2015 será un grande ano para as carreiras populares da cidade”, concluíu.