Un primo do siareiro falecido critica a Policía de Madrid por non socorrer ao seu familiar

Un primo do siareiro do Deportivo de La Coruña falecido nos altercados entre ultras de Riazor Blues e a Fronte Atlética criticou a actuación da Policía Municipal de Madrid por “non socorrer” o seu familiar, ao tempo que negou que fose “un delincuente”.

“Era un afeccionado ao fútbol dende os 14 anos, que fose violento ou non, non o discuto”, sinalou Andrés, en declaracións á Radio Galega.

Nelas, móstrase crítico coa actuación dos axentes cando o seu primo se atopaba na auga do Río Manzanares. “¿Por que non o salvaron?, cando estaba na auga había dúas policías municipais”. “Ninguén da familia o entende”, engadiu.

RESPONSABILIDADE DOS CLUBS

O primo de Francisco Javier Romero condenou tamén os altercados, que acabaron coa morte do seu familiar. Ademais, admite que este non debería “estar alí”. “E os principais responsables son os clubs que os financian”, apostilou.

Ao respecto, avogou por que se aplique aos afeccionados radicais o mesmo trato que a un maltratador. “Orde de afastamento dun estadio de fútbol, que ningún delincuente que vai con paus achéguese a un estadio”, formulou.

“UNHA EXCELENTE PERSOA”

Andrés, que trasladou o “enfado” da familia cos medios de comunicación e coa Federación Española de Fútbol e a Liga de Fútbol Profesional, negou que o seu primo fose “un delincuente” e atribuíu os seus antecedentes policiais á súa etapa vinculada coa droga.

“Fai dez anos que estaba rehabilitado”, insistiu. “O máis que estivo detido foron 72 horas”, argumentou este familiar, quen cualificou ao falecido como “unha excelente persoa”.

PRESENZA NOS ALTERCADOS

Preguntado que facía na zona dos altercados, recoñeceu que “non tiña que estar alí”. “Iso recoñecémolo toda a familia”, admitiu. Con todo, indicou que, co tempo, “se”van saber máis cousas”, pero non quixo afondar máis por “estar todo en mans de avogados”.

Mentres, tampouco ratificou se foi a Federación de Penas do Deportivo de La Coruña quen vendeu as entradas aos Riazor Blues. “Iso é o que din”, engadiu. Na mesma liña, pronunciouse sobre os autobuses nos que se desprazaron. “A ver quen os pagou”, preguntouse.

O primo do falecido non concretou se houbo unha “quedada” entre siareiros radicais. “Puido ser, non temos constancia diso, pero non debería ir alí”, reiterou.

“AÍNDA QUE SEXA O MEU PRIMO, VIOLENCIA CERO”

Por outra banda, tras incidir en que a súa morte “non “tiña que pasar”, instou a “poñer enriba da mesa” solucións. “Que esta xente non entre máis nun campo de fútbol”.

“Esta xente non vai por deporte, vai por violencia”. Ao respecto, preguntado se, entre estas persoas, inclúe a Francisco Javier Romero, contestou que “si”. “Aínda que sexa o meu primo, violencia cero”, remarcou.