Trece persoas con discapacidade de COGAMI na Coruña beneficiáronse da terapia con cabalos

Despois de asistir durante 20 horas repartidas en sesións de dúas horas durante as tardes dos luns nos meses de outubro, novembro e decembro, COGAMI (Confederación Galega de Persoas con Discapacidade) remata o curso de hipoterapia adaptada que impartiu nas instalacións da Real Sociedad Deportiva Hípica de A Coruña.

Un total de trece persoas con discapacidade, todas elas usuarias da oficina que COGAMI ten operativa en A Coruña, asistiron a estas clases de equitación adaptada e que organizou a entidade a través da colaboración do concello de A Coruña, por medio da convocatoria de subvención para a promoción e fomento do deporte.

A hipoterapia ou equinoterapia é un recurso terapéutico de crecente desenvolvemento, utilizado por médicos e psicoterapeutas como tratamento alternativo ás técnicas convencionais. Baséase en aspectos como a transmisión da calor corporal do cabalo á persoa, a transferencia de impulsos rítmicos e o movemento tridimensional.

A clase iniciaba cunha breve introdución ao manexo e coidado do cabalo para, posteriormente, realizar unha sesión de quecemento da musculatura e articulacións das persoas participantes, para preparalas para o exercicio sobre o cabalo. O tempo de traballo no cabalo foi variable e adaptado ás necesidades específicas de cada participante. As clases remataban coa realización de tarefas de coidado do cabalo, como alimentación e peiteado, e con exercicios de estiramento e relaxación.

Para realizar estas clases de equitación adaptada contamos con monitores/as cualificados e certificados ademais de persoal de apoio e acompañamento. Os cabalos escollidos para este exercicio foron especialmente adestrados, así como as instalacións estaban adaptadas ás persoas con mobilidade reducida ao igual que o transporte utilizado.