Teresa Romero presentará 270.000 sinaturas para evitar sacrificios como o de Excálibur

Excálibur

Teresa Romero e Javier Limón presentarán o próximo 19 de decembro un total de 270.000 sinaturas ante o rexistro do Ministerio de Sanidad para que os protocolos de actuación ante casos de ébola, tanto a nivel nacional como rexional, inclúan o trato que debe dispensarse aos animais domésticos das persoas potencialmente infectadas.

A recollida de sinaturas realizouse a través dunha petición creada por Javier Limón en change.org cando a súa muller aínda estaba ingresada no hospital. O próximo 19 de decembro, serán os dous os que presenten esta solicitude para que non volvan producirse se sacrificios como o do seu can.

A través dos seus avogados, o matrimonio solicitou á Delegación de Goberno de Madrid que lles conceda o dereito a reunión porque entenden que van ser máis de vinte as persoas que ese día se concentren ante o Ministerio, entre eles varios representantes de colectivos animalistas. Aínda non obtiveron resposta.

Na petición de Change.org, Limón explica que Excálibur era moi importante para a súa muller e para el e destaca que consideran que o que pasou foi “unha inxustiza”.

“Pedímosvos o voso apoio para que se faga xustiza e as persoas responsables de tomar a decisión errónea de sacrificar ao noso can dimitan, xa que había outras posibilidades menos prexudiciais e que ademais servían á comunidade científica para ter máis coñecemento sobre esta enfermidade, a súa evolución e posibles tratamentos”, sinala a petición.

“Ademais, en EE UU xurdiu un caso idéntico, e o resultado é que o can estivo en observación, se realizaron probas para saber se estaba infectado, e unha vez que a súa dona se recuperou puideron reatoparse”, agrega.