Soria asegura que o ERE de Alcoa non ten nada que ver coas poxas

O ministro de Industria, Enerxía e Turismo, José Manuel Soria, presentou este venres un informe ao Consello de Ministros no que se indica que a presentación do Expediente de Regulación de Emprego (ERE) de Alcoa “non ten nada que ver co mecanismo para a interrumpibilidade” deseñado polo seu departamento para asignar os incentivos ás grandes industrias pola súa contribución a modular a demanda do sistema eléctrico.

Tras realizar durante a rolda de prensa posterior ao Consello de Ministros esta consideración acerca do ERE, que afecta ás plantas de Lugo, A Coruña e Avilés, Soria explicou que “antes de que finalice o ano” e unha vez recibidos os informes da Comisión Nacional dos Mercados e a Competencia (CNMC) “haberá unha nova poxa”, na que Alcoa poderá participar.

“A única e exclusiva razón de por que non foi adxudicataria Alcoa na primeira poxa foi por unha estratexia absolutamente lexítima e libre da empresa”, sinalou, antes de indicar que, de cara á nova poxa, se a compañía “puxa realmente en condicións similares a como puxou pola fábrica de Lugo, non vai ter ningún problema tanto na fábrica da Coruña como de Avilés”.

O ministro explicou que Alcoa puxou na poxa para obter bloques de interrumpibilidade para a planta de Lugo “a un nivel que o fixo adxudicatario”, se ben “na poxa de Avilés e A Coruña non baixaron o suficiente para ser adxudicatarios”.

Xunto a isto, asegurou que os cambios no sistema de interrumpibilidade responden en parte á necesidade de evitar que a Comisión Europea considere este incentivo como axuda de Estado, como aconteceu en Italia, onde se obrigou a devolver 300 millóns. O novo mecanismo “ofrece exactamente as mesmas condicións para todos”, resolveu.