Prisión provisional e sen fianza para o detido como presunto autor da morte de ‘Jimmy’

O titular do xulgado de Instrución número 54 de Madrid, en función de garda de detidos, ordenou este martes a prisión provisional comunicada e sen fianza para o detido en Valencia como un dos presuntos autores da morte do siareiro do Deportivo Francisco Javier Romero, alcume ‘Jimmy’.

Segundo informou o Tribunal Superior de Xustiza de Madrid, o acusado enfróntase aos delitos de homicidio e participación en rifa tumultuaria pola súa intervención na liorta que acabou coa vida o pasado 30 de novembro dun simpatizante do Deportivo nas inmediacións do Vicente Calderón. Coa de hoxe, xa son catro as persoas que ingresaron en prisión.

O outro detido na capital levantina quedou en liberdade acusado de rifa tumultuaria e baixo as medidas preventivas de prohibición de achegarse a menos de un quilómetro do Vicente Calderón e de asistir a calquera partido do Atlético de Madrid, tanto oficial como amigable, dentro ou fóra de España.

A operación segue aberta e declarada baixo segredo de sumario. Os dous últimos detidos pertencen á sección Levante de grupo ultra Fronte Atlética. O balance de detidos pola chamada Operación Neptuno elévase xa a 84 persoas.