Povisa estende o seu servizo de hospitalización a domicilio ao Val Miñor

A partir do próximo luns, o Hospital Povisa estende o seu servizo de hospitalización a domicilio –HADO- aos pacientes adscritos ao centro de saúde de Val Miñor, en Nigrán.

Os profesionais de Povisa colaborarán estreitamente cos de atención primaria dese centro situado na Xunqueira-A Ramallosa, avaliando de forma conxunta o estado dos pacientes susceptibles de recibir atención hospitalaria a domicilio, que equipos deberán atendelos en función da súa complexidade e o programa de atención que deberá aplicárselles. Nas próximas semanas, irase ampliando o servizo aos pacientes dos centros de saúde de Baiona, Gondomar e Panxón.

A atención hospitalaria a domicilio supón nun avance importante na calidade asistencial dos pacientes de Povisa, sobre todo no caso daqueles que necesitan coidados exclusivamente paliativos ou nos que teñen grandes dificultades, por razón da súa idade, a súa situación familiar ou a súa enfermidade, para desprazarse ao hospital ou ao seu centro de saúde.

O novo servizo de HADO foi presentado hoxe no centro de saúde do Val Miñor nun acto no que estivo presente o director asistencial de Povisa, Luís Geremías; o subdirector asistencial de Procesos Asistenciais sen Ingreso e Urxencias do EOXI, José Benito Rodríguez; a xefa de Servizo de Atención Primaria do Centro de Saúde de Val Miñor, Pilar Cobas; o director médico de Povisa, Álvaro Pedrosa; a directora de Enfermaría de Povisa, María Antonia Muñoz; e o equipo de HADO que atenderá aos pacientes