Pedro Nimo estará no palco presidencial do Rio Natura Monbus Obradoiro

O atleta santiagués Pedro Nimo del Oro, recente Campión de España de Maratón, asistirá este fin de semana como convidado de honra ao choque entre o Rio Natura Monbus Obradoiro e o Tuenti Móbil Estudantes, que ocupará o Fontes do Sar o sábado a partir das 20.00 horas (non televisado).

O fondista, que toca con este campionato un dos puntos máis altos até o momento da súa carreira deportiva, será homenaxeado sobre o parqué do pavillón ante todos os afeccionados que se animen a acompañar ao equipo nesta cita.

Cun palmarés envexable, Nimo comezou a practicar deporte no seu colexio, pero curiosamente, non foi o atletismo o primeiro elixido: “Empecei xogando ao baloncesto, e de feito, o meu principal ídolo segue sendo Michael Jordan, pero fun notando que destacaba máis correndo, e ao final e debido a que a todos nos gusta gañar, decanteime por iso”.

Entre duras sesións de adestramento pensando sempre na seguinte competición, ten tempo de seguir a actualidade deportiva da cidade. “O que me gusta é o bo ambiente que hai entre os diferentes equipos e deportistas da cidade, ver que non hai celo, senón todo o contrario, que todos convivimos e achegamos algo á cidade, o cal é positivo e demostra que a pesar de ser pequena, Santiago está na elite do deporte”.

Respecto ao Rio Natura Monbus Obradoiro, que este fin de semana enfróntase a un equipo que vén de gañar ao Real Madrid, cabeza da clasificación, está convencido de que “este sábado podemos gañar”, ao que engade que “sigo ao equipo e escápome a velo ao Fontes do Sar sempre que podo. Creo que o máis importante é que o proxecto teña continuidade”.