Pasa a disposición xudicial o cidadán paraguaio que se entregou en Ponteareas

O cidadán paraguaio que se entregou no cuartel da Garda Civil de Ponteareas (Pontevedra) pola morte dunha persoa cuxos restos foron achados nun arcón conxelador na súa vivenda foi posto a disposición xudicial.

O home foi conducido esposado e escoltado por tres axentes da Garda Civil desde os calabozos dos xulgados até o despacho da titular do Xulgado de Instrución número 3 de Ponteareas, a cargo da causa, onde iniciou a súa comparecencia minutos antes das 13,00 horas.

Segundo confirmaron fontes próximas á investigación, o detido é José Antonio F.A., un cidadán paraguaio que era inquilino do piso localizado no número 7 da avenida Castelao de Ponteareas, onde o pasado mes de xuño foi achada a vítima dentro dun arcón conxelador.

Este individuo, que tamén estaba implicado nunha causa de fraude contra a facenda pública, era sospeito por ser inquilino desta vivenda e sobre el pesaba unha orde de procura e detención desde xuño, polo que o home escapou cara a Portugal, onde permaneceu todo este tempo, segundo confirmaron fontes da investigación.

Jose Antonio F.A. presentouse na tarde do martes no cuartel de Ponteareas manifestando ser o presunto autor da morte da persoa cuxos restos foron atopados o pasado mes de xuño nun arcón.