Os usuarios do aeroporto de Santiago medraron en novembro un 3,6%

Os pasaxeiros que utilizaron durante o pasado mes de novembro o aeroporto de Santiago creceron un 3,6 por cento con respecto ao mesmo mes do ano anterior, rozando as 140.000 persoas.

Segundo os datos feitos públicos este venres por Aena, durante o undécimo mes do ano fixeron uso de Lavacolla 139.932 persoas. Destes, a maior parte -119.814- empregaron traxectos nacionais -o 2,1 por cento máis- e 19.560 internacionais -o 10,6 por cento máis-.

En canto ás operacións, Santiago rexistrou 1.300 voos, dos cales 1.181 foron comerciais -978 nacionais e 203 internacionais-. O tráfico de mercadorías creceu na terminal compostelana un 6,6 por cento.

AEROPORTO DE VIGO

Pola súa banda, o aeroporto de Vigo superou durante o mes de novembro os 50.000 pasaxeiros, o que supón un 3,5 por cento máis que no mesmo mes do ano anterior. Dos 50.721 usuarios que empregaron voos comerciais, 47.066 fixérono en traxectos nacionais -un 6,4 por cento máis- e 3.655 en internacionais -un 19,2 por cento menos-.

No relativo ás operacións, Peinador rexistrou durante o penúltimo mes de 2014 un total de 691 voos, dos que 576 foron comerciais. A terminal de carga, pola súa banda, moveu 43.333 quilos de mercadorías, un 36,4 por cento máis que hai un ano.