Orozco asegura que pediu a investigación do seu patrimonio e o da súa familia e que acreditou a súa declaración

O alcalde de Lugo, o socialista Xosé Clemente López Orozco, asegurou que foi el mesmo quen solicitou que o seu patrimonio e o da súa familia fose investigado e subliñou que as pescudas de Vixiancia Aduaneira “acreditaron a exactitude” da súa declaración ante a xuíza instrutora da Operación Pokémon, Pilar de Lara.

Despois de transcender que Vixiancia Aduaneira investigou en outubro de 2013 ao alcalde de Lugo, así como á súa muller e fillas por un delito de branqueo de capitais, Orozco emitiu un comunicado no que afirma que o seu patrimonio e o da súa familia “foi investigado” a petición del mesmo, que “se presentou voluntariamente no seu día no xulgado para declarar e entregar as súas contas bancarias con todos os movementos rexistrados nestas dende antes de acceder á Alcaldía de Lugo”.

“Como non pode ser doutra forma, as investigacións de Vixiancia Aduaneira acreditaron a exactitude da declaración feita polo alcalde ante a xuíza respecto do seu patrimonio”, afirma Orozco, quen indica que no seu testemuño ante a instrutora deu conta do patrimonio dunha das súas fillas, enxeñeira de profesión, “que leva unha década de exercicio profesional, o que lle permitiu adquirir unha vivenda para a que contraeu unha hipoteca”.

RENDEMENTOS DO TRABALLO

Agrega que o seu patrimonio está “en réxime de gananciais” coa súa esposa e subliña que é “froito de toda unha vida de traballo del e da súa muller, que durante máis de 40 anos exerceron a docencia”, no caso de Orozco como catedrático de Filosofía.

O rexedor de Lugo dende xullo de 1999 afirma que os rendementos da súa vida laboral foron os que lle permitiron adquirir un piso en Lugo no ano 1981 e un apartamento en Sanxenxo (Pontevedra) en 1998.

Nese comunicado, Orozco tamén recorda que todas as súas propiedades son públicas e figuran no Rexistro de Intereses do Concello de Lugo, ao que se pode acceder a través da web municipal.

Finalmente, Orozco insiste en proclamar a súa “completa inocencia” porque afirma que “nunca cometeu ningún acto delituoso”. “A figura de José López Orozco quedará limpa de toda sospeita, xa que ninguén pode demostrar feitos inexistentes”, conclúe o comunicado.