O xuízo pola demanda de Ferros Añón celebrarase os días 22 e 23 de xaneiro

O xuízo pola demanda de Ferros Añón contra o Fondo de Reestruturación ordenada Bancaria (FROB) e NCG Banco, tras perder a súa inversión de 25 millóns de euros na entidade a consecuencia da ‘operación acordeón’, celebrarase os días 22 e 23 de xaneiro, segundo informa o Tribunal Superior de Xustiza de Galicia (TSXG).

O xuízo terá lugar no Xulgado de Instancia número 2 da Coruña, despois de que se admitise a trámite, en marzo de 2013, a demanda do empresario Manuel Añón Rey, propietario de Ferros Añón.

No seu momento, fontes da empresa indicaron que Añón se sentiu “absolutamente enganado” cando, en decembro de 2012, na entidade se executou unha ‘operación acordeón’, que consistiu en que se reduciu a cero o capital para facer, simultaneamente, unha ampliación.

Neste proceso, que se produciu ao inxectarse as axudas procedentes da UE a NCG Banco, a vintena de empresarios galegos que fixeran unha achega conxunta de 70 millóns de euros viron reducirse a cero a súa inversión e varios deles optaron por acudir á vía xudicial para reclamar o seu diñeiro. Algúns como Gadisa ou Inveravante obtiveron xa sentenzas favorables.

Añón achegara 25 millóns de euros á entidade tras lograr un acordo con NCG polo cal esta lle compraba ao empresario a participación que tiña na Corporación Novacaixagalicia. O pacto supoñía que o dono de Ferros Añón adquiriría un 1% do banco.