O viveiro de empresas da Grela difunde os proxectos dos seus emprendedores

O viveiro de empresas do Iglesiario da Grela organiza mañá, venres 12 de decembro, unha xornada de portas abertas para dar a coñecer as súas instalacións aos emprendedores que o desexen e onde os viveristas poden convidar a provedores, clientes e colaboradores para que coñezan o centro municipal.

Durante a actividade, que este ano cumpre a súa segunda edición e está organizada pola Concellaría de Emprego e Empresa que dirixe Luisa Cid, levará a cabo a presentación dos proxectos de emprendedores que formaron parte do itinerario de formación correspondente ao segundo semestre do ano, ademais de contar coa participación de dous emprendedores que montaron recentemente un negocio tras recibir asesoramento da área de Promoción Económica do Concello.

A xornada de portas abertas celebrarase de 17.00 a 19.00 horas e os viveristas compartirán as súas experiencias empresariais cos asistentes. O acto contará coa presenza de entidades colaboradoras como a Cámara de Comercio, Afigal, AJE, Igape, Centro Mans ou a Asociación de Empresarios da Grela. O viveiro de empresas da Grela ten 12 despachos e desde a súa creación pasaron máis de 20 empresas. O Concello sempre mantén aberto o prazo de recepción de solicitudes para realizar procesos de selección e poder cubrir os despachos dispoñibles a medida que queden dispoñibles.