O Rio Natura Monbus Obradoiro aprende a sufrir para superar ao Tuenti Móvil Estudiantes

Encontro Obradoiro-Estudiantes

O Rio Natura Monbus Obradoiro engadiu á súa marcadora a sexta vitoria da tempada, despois de imporse ao Tuenti Móvil Estudiantes nunha contenda moi tensa e igualada, cun final dramático coa bandexa que errou Javi Salgado, até ese momento heroe dos seus con 13 puntos.

Nos prolegómenos do encontro o Rio Natura Monbus brindoulle unha homenaxe ao campión Pedro Nimo. O público que asistiu a Sar ofreceulle unha cálida ovación. Os xogadores quixeron facer o propio, mediante a disciplina que mellor domina o atleta: correr. O máximo expoñente foi Pavel Pumprla, quen roubou, anotou a aro pasado, rematou unha contra en mate e foi superior a Fede Van Lacke na batalla do poste baixo. O conxunto do Ramiro de Maeztu buscou apoiarse no pick and pop con Nacho Martín, pero atopou a solución no acerto dun excelso Xavi Rabaseda. O beirado catalán, xogador máis valorado do encontro, anotou catro triplos de cinco tentativas, para acabar con 16 puntos.

Desde o triplo fixo moito dano o equipo adestrado por Txus Vidorreta. Cun destacado seis de oito no primeiros dez minutos, os estudantís reaccionaron ao meteórico arranque santiagués e estableceron os primeiros puntos de rédito (15-20).

No segundo cuarto continuou Rabaseda axusticiando ao Rio Natura. Con el e Nacho Martín o Estudiantes foise até os dez puntos. O Obradoiro, lonxe de deixarse levar, sacou a relucir o seu orgullo e aliouse coa afección para asinar un esperanzador parcial de 9-0. Miller, Haris e posteriormente Pozas devolveron a iniciativa no luminoso ao cadro de Moncho Fernández, pouco antes de que Javi Salgado volvese selar as táboas chegado o descanso (33-33).

A anotación, moi repartida polo bando obradoirista serviu para compensar o dominio de Javi Salgado e Xavi Rabaseda, autores 10 e 14 tantos respectivamente na primeira parte. Ademais, o Obradoiro aprendeu dos seus erros no pasado e pechou o rebote (24 defensivos e 13 ofensivos en todo o partido), impedindo as segundas oportunidades dos visitantes, que sumaron pola súa banda un total de 25 rebotes.

O segundo tempo foi un intercambio de golpes continuo. Ningunha das dúas escuadras conseguiu distanciarse, e o Estudiantes mostrouse incapaz de sentenciar ao Rio Natura Monbus nos momentos de maior desconcerto local. O terceiro cuarto serviu para ver a reaparición de Stefan Bircevic, tras varias semanas lesionado. O seu retorno foi a nota positiva para o equipo madrileño. Polo bando local, Alberto Corbacho continuou coa súa liña ascendente, con tres triplos en momentos cruciais nos que o equipo azulón ameazaba con romper o partido. Tamén acertou Rafa Luz desde a esquina, despois de recibir a asistencia de Juanjo Triguero, que repartiu xogo desde a pintura. Pechou o cuarto Maxi Kleber, de novo sensacional no traballo reboteador, con dez capturas, cun potente mate, pero o Estudiantes afrontou o dez últimos minutos cunha exigua vantaxe dun punto (51-52).

Tensáronse as bonecas no asalto final, e as defensas e os nervios impuxéronse. Pareceu dar a estocada definitiva Martín cun triplo lateral, pero refixéronse os xogadores santiagueses para imporse nun final de infarto.

O soberbio tapón de Keaton Nankivil e o seu mate á contra espolearon ao Rio Natura Monbus Obradoiro e a afección botouse encima para nublar o ataque estudantil. Unha bandexa de Corbacho tras capturar o rebote ofensivo puxo un arriba aos locais con apenas 40 segundos por xogarse.

Xa non volvería acertar ningún equipo. O Tuenti Móvil tivo a última, con 14 segundos, pero aí tamén gañou a partida de xadrez Moncho Fernández. O técnico de Pontepedriña decidiu non facer falta, impedindo así que Txus Vidorreta tirase de lousa para pertechar unha última acción. A ruleta rusa emparellou a Javi Salgado con Maxi Kleber. A base crebou ao alemán e deixou a bóla nunha cómoda bandexa, pero tras facer a gravata, o aro cuspiuna dando o triunfo ao Rio Natura Monbus.

Estalou de xúbilo Sar e celebrou con rabia a vitoria o equipo, conscientes todos da transcendencia do choque contra un rival directo. Volveu cantar vitoria o Obradoiro, sexta da tempada cando unicamente transcorreron 11 datas da competición. Dá un gran paso cara á certificación do obxectivo o Rio Natura antes de afrontar os “Pireneos”. Próximo rival, o Real Madrid de Pablo Laso (domingo 21, 12:15 horas).