O presidente da Liga de Fútbol Profesional acusa a Lendoiro de certa apoloxía da violencia

O presidente da Liga de Fútbol Profesional, Javier Tebas, acusou o expresidente do Deportivo, Augusto César Lendoiro, de “certa apoloxía” da violencia por acudir ao funeral do afeccionado do equipo falecido o pasado domingo, e defendeu que a súa destitución como embaixador da LFP “non é precipitada” porque “hai decisións que non necesitan pensarse moito”.

“Sorprendeume moito ver a Lendoiro no funeral, por iso tomei a decisión (de destituilo). Falei con el e díxenlle que non era unha conduta correcta para a LFP. Se el tiña relación persoal coa familia, a forma de dar o pésame é privada, non cunha exposición pública. Acudir a un acto público fai crer en certa apoloxía de alguén que vén a Madrid a pegarse. A súa destitución non é unha decisión precipitada, hai decisións que non necesitan pensarse moito”, apuntou Tebas ante a prensa, tras asistir a un foro de debate organizado por ‘El Confidencial’ en colaboración co ‘Banco Sabadell’.

Ademais, o presidente da LFP dixo “non entender” o minuto de silencio do equipo do Deportivo nun adestramento posterior ao falecemento do siareiro Francisco Javier Romero Taboada e apuntou que non sabe se os estamentos do fútbol español chegan “tarde” a atallar o problema da violencia no fútbol.

“Non sei se chegamos tarde, pero me sinto responsable na miña parte como presidente da LFP. Máis vale tarde que nunca. Eu pido a todo o mundo que faga autocrítica: a Federación Española, o Consello Superior de Deportes, a Policía, os afeccionados, os clubs, os medios de comunicación… Para non chegar tarde nunca máis”, pediu Tebas, quen era partidario de “suspender o partido” entre Atlético e Deportivo.

“A partir de agora cando haxa feitos graves antes dun partido non se xogará. Esa para que nos decatemos de que hai que actuar. É moi minoritario no fútbol, pero hai que cortalo inmediatamente”, aseverou, tras explicar que tamén queren acabar cos insultos nos campos de fútbol porque “da violencia verbal á física van tres cubatas”.

Tebas recalcou que “hai clubs que non teñen grupos ultra porque xa tomaron as súas decisións importantes, como o Barcelona ou o Real Madrid, ou o Espanyol tamén teñen bastante menos do que tiña” e anunciou a creación da “figura do director de partido ao estilo do que fai a UEFA”.

Entre outras medias avanzadas, o presidente da LFP destacou a perda de puntos para equipos que non sexan contundentes coa violencia ou a creación dun código ético para os medios de comunicación. “Un tema banal como a gala da LFP acaba co Calderón cantando ‘Tebas morre”, recordou, acusando a prensa de ter a súa parte de responsabilidade.