O Porto de Vigo recibirá a escala do orixinal Disney Magic en agosto de 2015

O Porto de Vigo recibirá en 2015 a escala do Disney Magic, o orixinal barco de cruceiro operado por Disney Cruise Line (dentro da Walt Disney Company). Será o 6 de agosto cando este cruceiro faga a súa entrada na Estación Marítima de Vigo.

Segundo valorou o Presidente da Autoridade Portuaria de Vigo, Ignacio López-Chaves, esta escala é froito do intenso traballo que leva a cabo a institución que preside na promoción das infraestruturas dedicadas ao tráfico de cruceiros no Porto de Vigo. Así mesmo, demostra a aposta da dársena viguesa por buques de gran porte, con capacidade para acoller un gran número de cruceristas.

A escala en Vigo encádrase dentro dun cruceiro de 7 noites polo Mediterráneo, con saídas dende Barcelona e Dover (Inglaterra). Será na súa 4ª xornada cando visite o Porto de Vigo, tras un día de navegación dende o porto inglés de Dover (Inglaterra). Tras a súa parada en Vigo, partirá cara a Lisboa (Portugal), visitando tamén Xibraltar, antes de finalizar en Barcelona, onde poñerá fin ao seu periplo.

Gran capacidade

Cunha capacidade para aproximadamente 2.400 pasaxeiros e 945 tripulantes, o Disney Magic entrou en servizo en 1998, aínda que foi totalmente renovado en 2008. O seu irmán, o Disney Wonder, foi botado en 1999. Ambos os dous barcos teñen a súa base en Porto Canaval que se encontra moi preto dos parques de Orlando (Florida, EUA).

A compañía Disney deseñou o barco cun estilo art-decó coa reminiscencia dos grandes transatlánticos de principios do século XX. O barco conta con variadas mostras relacionadas co mundo Disney coas súas cores brillantes, pero a maior parte do barco está basicamente decorado para todo o mundo, non só para os fanáticos de Disney ou para os nenos.

Construído polo estaleiro italiano Fincantieri, dende o verán do 2000, o cruceiro estivo a dar viaxes semanais a Castaway Cay e a varias illas Caribeñas (St. Maarten, St. Thomas, St. Croix, Rula, Key West, Gran Caimán e Cozumel) fóra do seu porto de partida en Port Canaveral, Florida. En xuño de 2005 o Disney Magic foi posicionado na Costa Oeste dos Estados Unidos con motivo do 50 aniversario de Disneyland.

Cunha eslora de 294 metros por 32 de manga e 83.000 GT, o Disney Magic foi concibido como un “clásico moderno”, para evocar todo o glamour e a beleza da época dourada das viaxes transoceánicas. Representa o Art Deco nas pinturas, esculturas e mobles de madeira dos seus interiores. A riqueza e minuciosidade nos seus detalles pódese apreciar sobre todo nos seus murais e pezas que enmarcan as paredes dos seus interiores. No seu vestíbulo principal, e apreciable á hora de embarcar, encóntrase a figura en bronce de Mickey, realizada polos enxeñeiros da Factoría Disney. Chama a atención a espectacular lámpada de vidro realizada polo famoso artista Dale Chihuly de Seattle.

A frota

A frota de Disney Cruises está composta polos buques xemelgos Disney Magic e Disney Wonder, deseñados para render homenaxe á grande era dos transatlánticos de antano que cruzaban o Océano Atlántico e comunicaban América e Europa. Gozan de todas as comodidades e luxos que pode ter un cruceiro de pracer coa maxia Disney. Son buques que se concibiron especialmente pensando nas familias, combinando nos seus interiores un estilo elegante cun toque de diversión.

Contan con 10 cubertas e un servizo excepcional a bordo. Os camarotes están ben equipados e configurados especialmente para as familias, con amplos espazos, a maioría con vistas ao mar.

Dende 2011, Disney Cruises conta cunha nova nave de cruceiros, o Disney Dream, deseñado para rememorar a época dourada dos xa clásicos cruceiros de antano, pero coa tecnoloxía máis avanzada. Trátase dun barco pensado na familia, combinando un estilo elegante con cómodas instalacións, e sempre coa maxia Disney a bordo. Así mesmo, dende 2012, a frota conta cun cuarto barco, o Disney Fantasy, de iguais dimensións e capacidade que o Disney Dream.