O Hotel Puerta del Camino prepárase para acoller a III Basket & Cheese do Club de Empresas Obradoiro

O Rio Natura Monbus Obradoiro ultima xa os detalles da terceira edición do evento “Basket & Cheese. Empresa e deporte: Xuntos comunicamos mellor”, que terá lugar mañá a partir das 19.00 horas no Hotel Puerta del Camino. Ao acto están convidados todos os membros do Club de Empresas Obradoiro, que poderán gozar logo dos produtos de Queixos Barral, principal patrocinador do mesmo.

A cita será inaugurada por Javier Puñal, director de mercadotecnia do Rio Natura Monbus Obradoiro. O coloquio, moderado polo xornalista Alberto González, contará con cinco convidados de excepción: Alfredo Quinteiro, experto en mercadotecnia e eventos deportivos; Javier Gancedo, manager editorial da Euroliga; Juan Carlos Díaz, Director Comercial da liga de Fútbol Profesional; Jorge Mahía, Director de Mercadotecnia e Desenvolvemento de Negocio de Abanca; e Joan Manel Carreiras, Director de Desenvolvemento de Negocio da ACB.

Os expertos debaterán desde o seu enfoque persoal e profesional a situación actual na relación das empresas e as entidades deportivas, así como da dirección que a comunicación de ambas as partes está a tomar debida a ela.

Tras a clausura da actividade cos discursos de Raúl López, presidente do Rio Natura Monbus Obradoiro, e de José Ramón Lete, Secretario Xeral para o Deporte, todos os asistentes, entre os que se atoparán o persoal deportivo e corpo técnico ao completo, poderán gozar dunha cata especial dos produtos lácteos de Queixos Barral, acompañados do Viño Oficial Obradoiro das adegas Via Romana.

Indispensables tamén para o desenvolvemento técnico e humano do evento serán as colaboracións de Xoiaría Jael, Cega Audiovisuais, Hotel Pazo de Altamira, Air Hostess, Cabreiroá, Vinigal, e do propio Hotel Puerta del Camino.