O concello pontevedrés ultima o proxecto de saneamento do Gafos

A Xunta de Galicia recibiu o pasado 31 de outubro o proxecto do saneamento do Gafos elaborado polo Concello de Pontevedra, tal e como quedara na última reunión de seguimento do convenio de saneamento do rural pontevedrés. Na actualidade o Concello está pendente introducir unha última corrección a este proxecto, solicitada pola empresa externa contratada pola Xunta para a supervisión do proxecto.

Segundo conclúe o propio informe da empresa externa, “dende o punto de vista documental é preciso enmendar e/ou ampliar certos anexos do presente proxecto”, e nestes momentos só se está pendente de rematar a última das peticións do informe para volverllo a trasladar á Xunta.

O concelleiro responsábel do Ciclo da Auga, Raimundo González destacou esta mañá que o Concello de Pontevedra está a realizar o traballo comprometido con Augas de Galiza, ao igual que esta empresa pública da Xunta.

Sobre as declaracións do Grupo Municipal do Partido Popular, destacou que “volven a facer de recadeiros da Xunta, e o que menos lles preocupa é defender os intereses dos veciños de Pontevedra”.