O Concello de Cerdedo acomete o acondicionamento e mellora nas distintas depuradoras de titularidade municipal

Dentro da preocupación que mostra o equipo de goberno por todos os asuntos ambientais e tras os distintos informes e visitas ás depuradoras que está a realizar a técnica especialista no medio ambiente, determinouse un plan de actuacións para mellorar as condicións de vertedura e situación xeral das depuradoras.

Estas actuacións iniciaranse con tarefas de rozas en todo o perímetro das distintas depuradoras debido á gran cantidade de maleza que as rodea que en moitas ocasións dificulta o paso ás mesmas para realizar as tarefas de mantemento. Posteriormente realizarase unha limpeza exhaustiva das mesmas e de todos os seus compoñentes.

Tentarase mellorar as condicións de vertedura e a primeira actuación será no lugar de Vilalén, onde se canalizará a saída de augas da depuradora até o río con tubaxe de PVC nunha lonxitude aproximadade 100 m. Igualmente colocarase unha arqueta de toma de mostras nas inmediacións da mesma. Esta arqueta úsase para analizar a saída das verteduras e comprobar o correcto funcionamento da mesma.

Esta actuación repetirase de forma progresiva no resto de depuradoras municipais.