O Concello da Coruña inviste 3,8 millóns de euros ao ano nun dos contratos do servizo público de axuda a domicilio

O Concello da Coruña sacará a concurso un dos tres contratos do servizo público de axuda a domicilio, un programa que ten como principal obxectivo atender ás persoas no desenvolvemento das necesidades da súa vida diaria para impulsar así a súa integración social. A Xunta de Goberno Local aprobou, na sesión celebrada onte, licitar esta parte do servizo -a de maior contía económica- por un importe final de 3,8 millóns de euros ao ano. O programa de axuda a domicilio complétase con outros dous contratos, polo que a suma total dos tres supera os 5 millóns de euros.

A Xunta de Goberno acordou a contratación do servizo de axuda a domicilio, así como a apertura da licitación mediante procedemento aberto. Este contrato é por dous anos, aínda que se pode prorrogar por dous máis. Trátase dun programa que exemplifica o obxectivo do Executivo municipal de garantir a atención das persoas que máis o necesitan, pois traballa sobre todo con persoas maiores con déficits de autonomía e con discapacidade. Así, a empresa adxudicataria deste contrato axudará aos usuarios nas súas actividades básicas da vida diaria, como vestirse, facer a compra e cociñar os alimentos, ademais de fomentar a hixiene persoal e desenvolver tarefas de apoio psicosocial, con accións terapéuticas, educativas, socioculturais e de acompañamento e socialización.

O servizo prestarase entre as 07.00 e as 22.00 horas, de luns a sábado, aínda que fóra dese horario tamén se atenderá aos usuarios si é necesario. De feito, o Goberno municipal encargarase de propor as altas no servizo e tamén incrementará o número de horas de prestación do servizo se o estima oportuno.

Co obxectivo de ofrecer un servizo de calidade e, para garantir que se axusta ás características fixadas no prego de contratación, o xestor do servizo terá que facer un seguimento individualizado de cada usuario.

Os orzamentos de 2015 volven reflectir o compromiso municipal de dar resposta ás demandas reais dos cidadáns. O Concello realizou un gran esforzo investidor cunha partida de 5.432.000 euros para cubrir os tres contratos nos que se divide este servizo de axuda a domicilio, considerado estratéxico para o actual equipo de goberno. Así, para 2015, o orzamento para axuda a domicilio aumenta un 4% con respecto a este ano, un incremento aínda maior se se compara con 2011, cando o orzamento era de 4.847.250 euros, é dicir, un 12% menos do fixado para o próximo ano -584.750 euros menos-.