O arcebispo de Santiago aposta pola fe para transformar os valores débiles

O arcebispo de Santiago, Julián Barrio, apostou este martes por retomar os “fundamentos do cristianismo” e da fe para “transformar os valores débiles” da cultura actual e “erradicar” da sociedade “todo egoísmo” e “toda corrupción”.

Así o sinalou durante a homilía pronunciada no acto de Translación dos restos do Apóstolo, que como cada 30 de decembro acolleu a Catedral de Santiago, en resposta á ofrenda realizada polo delegado rexio, o alcalde compostelán, Agustín Hernández.

Durante a súa intervención, monseñor Barrio asegurou que hoxe en día é necesario recuperar os “fundamentos do cristianismo” para “transformar os valores débiles” da cultura e a sociedade actual e “superar tanto a inmoralidade coma a frivolidade”.

Non ignoramos moitos dos aspectos positivos da cultura actual, pero notamos que non se percibe frecuentemente a referencia a Deus en aspectos diarios da vida ou en propostas que non teñen en consideración a dignidade da persoa humana no ámbito cultural, político, económico ou relixioso,” apuntou Julián Barrio, ao tempo que pediu “sacar de novo á luz a prioridade de Deus”.

CRISE

Para o arcebispo compostelán, a fe cristiá “só poderá ser vivida e operante” en ser humano na medida que se erradique da sociedade “todo egoísmo, toda corrupción como actitude dos que están dispostos a calquera cousa para enriquecerse, toda ambición propia e toda comodidade irresponsable”.

Por iso, Julián Barrio pediu a intercesión do Apóstolo para guiar á sociedade actual e tivo un especial recordo para as “persoas e familias que están a padecer as consecuencias da crise económica”.