Moncho Fernández: “Tuenti Móbil Estudantes está competindo moi ben”

Moncho Fernández fixo hoxe un pequeno repaso aos perigos que lle esperan este fin de semana ao Rio Natura Monbus Obradoiro coa visita dun potente Tuenti Móbil Estudantes (20.00 horas – non televisado), que vén de gañar a pasada xornada ao imbatido até o momento Real Madrid, ao que o técnico santiagués apunta: “A liga Endesa é tan boa porque todo o mundo pode gañar a calquera, o F.C. Barcelona tamén perdeu en Sevilla”.

En referencia a esa pasada xornada do rival, Fernández observa que “cando perde o Real Madrid sempre é unha sorpresa, pero neste caso Tuenti Móbil Estudantes estivo moi ben, con moita fe na vitoria e moito acerto nos momentos importantes do choque. Foron moi intelixentes e no ultimo tramo do partido souberon xogar moi ben as súas bazas. Tiveron acerto e tamén unha gran defensa”. A iso, engade: “Houbo outros factores máis importantes, sobre todo, crer e celebrar cada canastra coma se fose a ultima. Estiveron moi ben, igual que o estiveron co Bilbao Basket, pero este escapóuselle na última xogada. Estudantes está a competir moi ben, e iso xogando sen Nunnally e Bircevic”.

As expectativas do xogo dos de Txus Vidorreta parecen estar claras: “Txus é un adestrador que domina perfectamente o uso das alternativas e seguro que as imos a ver aquí, todo tipo de zonas ou mixtas, el contrólaas”. En concreto, “seguro que como o ano pasado, volverán probar box-and-one con Corbacho, triangulo e dous cando teñamos dous beirados en pista, etc”.

Dos seus homes, destaca a Nacho Martín ou Javi Salgado “que está claro que son xogadores básicos para eles tanto polo que anotan como polo que dan”. Tamén Jaime Fernández, que “está a xogar tamén de escolta ultimamente e faio francamente ben. É capaz de xerar un contra un, libera a Salgado para o ataque, etc. Aínda que é novo, leva anos dabondo no equipo para ter galóns”.

Dos seus, o adestrador conta cos doce este fin de semana. Respecto ao rebote, Fernández afirma que non me preocupa que perdamos rebotes de ataque, iso é o normal, pero si hai algún que deberiamos facer noso e ese é un traballo de todos non só dos interiores. Hai que pensar que a defensa non se acaba ata que non reboteas”. Concluíu facendo mención á pasada xornada en Zaragoza: “Alí perdemos contra un equipo Eurocup e sen dous homes importantísimos para nós como son Pavel Pumprla e Maxi Kleber. E se miramos máis atrás, contra outro Eurocup como Herbalife Gran Canaria, un Euroleague como Valencia Basket Club, etc. O que quero dicir é que a nosa realidade é outra e temos que darnos conta sempre de quen somos”.