Lendoiro é cesado como embaixador da liga tras asistir ao enterro do seareiro do Depor

A liga de Fútbol Profesional (LFP) cesou ao expresidente do Deportivo da Coruña Augusto César Lendoiro como embaixador da liga, ao que chegou o pasado mes de maio, despois de que asistise ao enterro de Francisco Javier Romero Taboada, o seareiro do Deportivo da Coruña falecido a consecuencia dun traumatismo cranioencefálico tras os altercados entre membros de Riazor Blues e a Fronte Atlético.

O presidente da LFP, Javier Tebas, adoptou esta decisión ao considerar que o cargo honorífico que ostenta Lendoiro non é compatible cos ideais dunha institución que loita contra a violencia no deporte e o racismo e que condenou os incidentes protagonizados polos Riazor Blues na capital, segundo informaron fontes da liga.

A presenza a título individual de Lendoiro no enterro do seareiro falecido “non procede” no caso dunha persoa que representa á LFP e vai contra a imaxe de xogo limpo e respecto que defende a institución.

Lendoiro foi nomeado embaixador da liga o pasado mes de maio en recoñecemento á súa dilatada experiencia e a súa traxectoria no mundo do fútbol. Lendoiro estivo á fronte do RC Deportivo durante 25 anos, sendo o dirixente máis lonxevo do fútbol profesional español. Desde que accedese ao cargo en 1988, o club logrou seis títulos: un Campionato de Liga (1999-2000), dúas Copas do Rei (1995 e 2002) e tres Supercopas de España (1995, 2000 e 2002).